YouTuber马米高宣布离开台湾曾多番批评台湾人好假被劝离开香港网民反撑：喜欢真性情

旅游购物 2024年10月27日 20:14 645 王柯仁_1

马米高影片截图

YouTuber马米高（Michael）为马蹄露姪子，两年前到台湾发展兼读硕士课程，先后担任小学老师和演艺工作，不过去年就曾拍摄以「『移民台湾三思』台湾人好假～死不认错～不可直接批评～」为题嘅影片，与赴台10年嘅香港人Jenny大谈港台文化差异，闹出台湾文化冲突事件，马米高当时直言尚未适应当地生活，力数台湾缺点，直斥台湾人好假又唔尊重他人私隐：「嚟台湾玩下就好啦，定居就真係要谂过度过」，被台湾网民批评无礼貌，更被劝离开台湾。前日（9月30日），马米高上载最新影片，直言要离开台湾，更加讲到喊：「喊到成个姑姐咁」，表示自己输咗：「明星来台两年一直星途崎岖，两年之后最终不敌各种台式思维想法，黯然离开台湾演艺圈，如众多酸民所愿 —『滚回中国香港』～」。

马米高于影片中表示决定唔留喺台湾发展，指其实毕业后已得到艺术家签证，仲可以留喺台湾3年，但就选择唔留低，不过如果有人搵佢拍摄係可以回台拍嘢。马米高坦言呢两年经历好多，但仲有好多唔适应嘅嘢：「嗰种唔惯已经进化到唔会令我唔开心，只会觉得闷闷不乐，好唔知点，唔会带到畀你活力、灵感，或者带畀你将来」；佢又重提一年前嘅影片，指当时已讲咗大部分喺台湾唔习惯嘅嘢，笑言自己走咗就再无人指出台湾嘅错误，更批评台湾人喜爱情绪勒索。事源，台湾节目于上月播出「新一代转台王大调查」单元中，其中一段马米高指「看到刘伊心会转台」嘅VCR掀起网民讨论；事后，马米高发声明指节目组当时指定要佢讲出一段针对刘伊心唔礼貌嘅内容以达致节目效果，并承诺会将样子马赛克先答应配合拍摄，不过，节目组因沟通上出现问题而未履行承诺。马米高于影片指，发声明前已通知负责人会交代事情，未料收到负责人嘅负面评价，指对马米高好失望和好唔舒服；一开始马米高都有检讨自己，但后来有台湾朋友直言佢被该负责人情绪勒索：「其实都几恐怖，因为喺台湾好多时你想得到一样嘢，你同佢哋讲道理係唔会听嘅，因为呢到嘅人好惊人失望。如果你同佢硬碰硬，佢又会觉得无面，唔会妥协」。

不过，马米高好感谢台湾畀佢嘅一切，包括经验、新朋友，亦令佢更了解自己想要及唔想要啲咩，讲到要用纸巾抹眼泪，更加抹到有纸巾痴住喺眼皮到：「虽然我好多嘢都睇唔顺眼，但我都好感激遇到好好嘅人，点解会喊嘅？黐线」，马米高指呢啲都係开心眼泪，表示虽然畀人闹到咁惨，遇到好多唔同嘅嘢，好多难题，但会带住回忆走：「我唔知点解我会喊，黐线，点解我会喊嘅，有问题」。最后，马米高表示：「我爱台湾，谢谢台湾，明星滚回中国香港，如你哋所愿，以后唔会再有人话你哋错架啦，以后嘅一切大家只会讲好棒棒、好可爱」。马米高于影片下留言：「无论好坏经历，到最后都会是人生中有价值的经验。我是不认同某些台湾的东西，但我感谢台湾给我的一切～明星还是爱你们的，谢谢华语市场！」。

唔少网民都表示欣赏马米高嘅真性情：「有100个憎你，但係你望下后面，你唔知道有10万个锺意你。只係平时潜水冇表态姐～加油马老师」、「较真既人路係难行啲」、「完全明白你既踩唔係真係踩，有时指出问题唔代表你唔中意果个地方」、「你係一个敢言的人，我欣赏你」等等。