佘诗曼母女豪请50人食饭埋单5位数与胡枫可爱互动: 阿佘搵嘅係大茶饭

今日新闻 2024年10月27日 18:08 580 张婉婷_1

佘诗曼

现年49岁嘅佘诗曼凭《新闻女王》「Man姐」文慧心一角，以大热姿态夺得「最佳女主角」、「马来西亚最喜爱TVB女主角」」及「大湾区最喜爱TVB女主角」，成为TVB史上首位三届视后。人气爆灯嘅阿佘工作不断，经常中港两地走，近日佘妈妈宴客，豪请数十位好朋友食大餐，而孝顺女佘诗曼全程陪伴妈妈，仲做老闆帮妈妈埋单。

佘妈妈年半前患病，喺康复后不时与朋友聚会，日前佘妈妈包咗一间中菜馆请数十位好朋友食大餐，胡枫、邵音音及叶子媚都係坐上客，而佘诗曼就全程陪住妈妈，最后仲做「老闆」帮妈妈埋单。

92岁嘅胡枫，喺小红书以「今天好开心，总算见到我们的新闻女王-佘诗曼」为题出PO，并写上：「啊佘的妈妈经常请我们大家一起吃饭。而且她做的饭我都非常喜欢吃。听闻阿佘又要準备拍新剧喇！希望她可以过得越来越好啦！」喺影片中，佘诗曼坐喺妈妈及胡枫之间，胡枫笑话：「Hello，今晚点解咁多人呀？就係阿佘妈请客啦！即係佘诗曼嘅妈妈请客，我相信找数嘅就梗係阿佘喇！」隔离嘅佘诗曼即刻笑住鬼马地话：「唔係你请咩？！」胡枫就回答话：「我请冇所谓，最紧要阿佘诗曼开心㗎啫！我哋呢次次同你妈咪大家一齐聚会都唔见你嘅，点解会唔出现呢？」佘诗曼解释话：「如果我平时唔去做嘢，今晚就请唔到呢餐饭喇！因为要去搵钱！」胡枫即係就表示佘诗曼搵嘅係大茶饭，而佘诗曼就搞笑否认，并话係大茶粿，跟住将手上嘅茶粿送畀胡枫，而胡枫就表示茶粿係由佘妈妈亲手整，仲话要打包返屋企。之后胡枫问佘诗曼「最近忙啲咩」，而佘诗曼就表示要搭飞机四处拍嘢及出席活动，今个月就留低陪妈咪。被问到现时拍紧啲咩嘅时候，佘诗曼就表示未拍，现时都係睇紧剧集剧本。

另外，佘妈妈今次宴客嘅菜单非常丰富，例如花雕鸡油蒸阿拉斯加蟹、杏汁炖白肺汤、清蒸海上鲜、五头南非鲍鱼、脆皮炸子鸡及虾籽乾烧伊麵等等，保守估计埋单要最少4万蚊。